L-istrixx Nru 14
Abigajl, Ħaġġi u Qalbufidu jaslu f’Ħal Ġorf. Hemmhekk, naturalment, jiltaqgħu mal-Ġorf, ġgant li n-nies kollha tibża’ minnu. X’jagħmel dan il-Ġorf? Jiekol in-nies? Jiblagħhom? Ħaġġi n-nanu jipprova jkeskes lil Qalbufidu għalih peress li dan fih raġel u jarmi s-saħħa. Imma flok juża s-saħħa ta’ idejh, Qalbufidu joħroġ arma stramba mill-but. U li ma taqtgħux x’inhi din l-arma?!
Il-Konti Werwer jitlaq ħanżira tiġri ma’ saqajn l-uħux u l-fatati biex tiekol dak illi ssib. Dan sabiex il-ħanżira teħxien biżżejjed biex isajjruha u jikluha fl-ikla kbira tat-2 ta’ Novembru, l-festa ta’ kull sena msejħa L-Għid tal-Erwieħ. Imma fil-ġurnata tal-preparamenti tal-ikla, l-ħanżira ddur dawra sewwa mal-kastell u ma’ tħallix farka ikel jew qatra xorb. Ħeqq! Mhix ħanżira, jewwilla!
Imber ikompli bl-avventuri tiegħu mal-Bâbi tax-Xaqqufija. Huma jgħallmuh jispara l-qaws u l-vleġġa u waqt li jkun qed jipprattika fuq il-bċejjeċ tal-fuħħar u ċ-ċaqquf, huwa jispara fuq ġarra magħluqa u meta tinkiser, minnha toħroġ ruħ ċkejkna. Min hija din ir-ruħ? X’hemm lest għal Imber? Minn xiex għandu jgħaddi din id-darba?
Titilfux din il-ħarġa nru.14 ta’ L-istrixx li se titqassam b’xejn mal-ġurnal L-Orizzont tad-9 ta’ Ottubru 2010.
L-istrixx Nru 13
Nir : Nir għamel ħbieb ma’ Maris, tfajla tamparu li għandha sottomarin isfar. Hu jiskopri iktar sigrieti dwar Maris meta tieħdu “d-dar” tagħha li fil-fatt mhi dar xejn imma sottomarin ġgantesk. Iżda rizza kbira li tispara t-torpedini tattakkahom u Nir flimkien ma’ sieħbu l-kelb il-baħar jikkonfrontaw din l-opra qerrieda tal-kattiv Baruni taż-Żejt.
Kastell Werwer : Il-Konti Werwer għandu kastell li fih iżomm kollezzjoni ta’ oġġetti strambi u karattri tal-biża’. Din id-darba jġib miegħu “stallett li jiġġieled waħdu” bil-ħsieb li jagħmel dwell mal-Ammiral. Iżda l-Lajxulli, in-Nannagħula, il-fatat u l-iskeletru jdeffsu mneħirhom fil-biċċa u jagħmlu waħda minn tagħhom.
Abigajl u l-Fifra Saħħarija: Abigajl, Ħaġġi u Qalbufidu jkomplu jterrqu lejn il-Belt ta’ Abu, fejn jingħad, li hemmhekk kollox sabiħ u kulħadd kuntent. Huma jaslu f’raħal ċkejken u jitolbu lil Doru r-raħħal biex jagħtihom x’jieklu jekk jaħdmulu fir-razzett u fl-għelieqi tiegħu. Imma sħaba inkwiet tersaq fuqhom ilkoll u thedded il-ġid kollu li għandu Doru imma Abigajl malajr tidħol biex issalva s-sitwazzjoni.
Dan kollu f' L-ISTRIXX li jitqassam b’xejn mal-ġurnal l-orizzont tas-Sibt 11 ta’ Settembru 2010.
Bakkru ħa tilħquh!
L-istrixx Nru 12
Is-sensiela ta’ Abigajl u l-Fifra Saħħarija fuq l-Istrixx : Abigajl għandha fifra speċjali li meta ddoqqha toħroġ minnha mużika li tagħmel is-seħer. Hija u żewġt iħbieb tagħha, nanu bl-isem ta’ Ħaggi u ġgant bl-isem ta’ Qalbufidu, telqulha għal vjaġġ twil li suppost għandu jwassalhom fil-Belt ta’ Abu. F’din il-belt jgħidu li, hemm kollox sabiħ u kulħadd kuntent. Aqraw l-ewwel episodju ta’ dan il-vjaġġ.
Kastell Werwer : Il-Konti Werwer xtara kastell biex fih jiġbor il-kollezzjoni tiegħu ta’ oġġetti strambi u karattri tal-biża’. Raġel li jġib kaxxa lill-Konti, jitwaħħax meta jiltaqa’ man-Nanna Għula, mal-Lajxulli ikrah u mal-fatat li joqogħdu fl-istess kastell. Tal-biża’ jew tad-daħk?...Araw intom!
Felċi l-Fellus : jixtieq jitgħallem itir biex ma jibqax jgħix ġo kaxxa żgħira. Jitlob l-għajnuna ta’ Makk u ta’ Ballun tal-Kamoxxa u dawn jaraw kif jagħmlu biex “itajjruh”.
Il-Wied għan-Niżla : In-Nemes għandu miżbla u fiha jsib mutur mormi. Malajr tiġih l-idea biex jaqla’ xi ħaġa tal-flus minnu. Is-Serp u l-Korvu, l-assistenti fidili tiegħu, jirkbu l-mutur biex bih jagħmlu wirja ta’ gabirjoli u bużullotti. Bl-istorbju illi jagħmlu, l-fenek u sħabu malajr jindunaw bil-ħsara li tkun qed issir fil-wied u jippjanaw biex iwaqqfuhom.
Dawret iż-Żugraga : jkomplu l-praspar taż-Żugragin li jgħixu f’Dawret iż-Żugraga. Norma trid l-għanuna ta’ sħabha biex tibni ħajt li waqa’, ħalli l-barri ta’ Ġamri ma jaħrabx. Imma ssib lil kulħadd rieqed.
Kompetizzjoni li tista’ trebbħek ballun tal-futbol u ktieb.
Dan kollu fuq L-ISTRIXX nru.12 li jitqassam b’xejn mal-ġurnal l-orizzont tas-Sibt 14 ta’ Awwissu 2010.
Ħarga nru.11
Qatt smajtu bit-Tazza tad-Dinja tal-Komiks? Kontu tobsru li n-Nanna Zikizokk taf tilgħab il-ballun u li l-kelb ta’ Gori Grillu kapaċi joqgħod gowler? Iż-Żeppellina, (dik in-nannakola tal-aġenzija sigrieta ta’ Swadra Ż) għaqqdet skwadra ta’ ħdax-il plejer mill-karattri tal-ISTRIXX biex jilagħbu l-ballun kontra l-skwadra tal-karattri kattivi fil-logħba finali tat-Tazza tad-Dinja tal-Komiks. Min taħsbu li se jirbaħ? Xalata ta’ praspar u azzjoni bil-ballun. Mhux ta’ min jitlef l-eċitament ta’ din il-logħba importanti.
Il-Kaptan u l-pirati tiegħu suppost li jbaħħru madwar id-dinja biex ifittxu xi teżor imma naħseb iktar iqattgħu ħin jagħmlu l-bawxati fuq il-bastiment tagħhom. Paprati tal-Pirati hija storja oħra għal dan l-istaġun tas-sajf.
Dan kollu f’din il-ħarġa speċjali tas-sajf fl-ISTRIXX.
Akkwista kopja ta’ L-ISTRIXX (stejjer pinguti) nru.11 imqassam B’XEJN mal-ġurnal L-ORIZZONT tas-Sibt 10 ta’ Lulju 2010.
Ħarġa nru.10
EKOLINA u ż-Żabbari jiskopru li l-wilġa (il-parti ta’ fuq tal-wied) se tinbidel fi blokka bini u toroq. X’ser jibqa’ mis-sbuħija tal-wied?... XEJN!... u min taħsbu li se jagħmel dan il-proġett? .... Qtajtu! ....Ħadd ħlief il-FARRAXK. Bħas-soltu, il-ħbieb tagħna jeħduha miegħu biex jipprovaw iżommuh. Tgħid jirnexxielhom?
NIR tiġih il-kurżita biex jitkixxef dwar dak is-sottomarin isfar li kien salvah l-aħħar darba. Imma biex isolvi dan il-misteru jiffaċċa l-periklu mill-opri tal-baħar tal-baruni.
IMBER jinqala’ mit-tajn li sab ruħu fih l-aħħar darba u jasal f’post stramb li fih jgħixu l-BÂBI, nies żgħar fil-qies u żgħar fl-eta. Dawn ma jkunux iriduh hemmhekk imma agħar minn hekk jiġi mostru kbir u ikrah biex jieklu. Imma ċ-ċkejken Imber isib il-kuraġġ biex jikkonfrontah.
Akkwista kopja ta’ L-ISTRIXX (stejjer pinġuti) nru.10 imqassam B’XEJN mal-ġurnal L-ORIZZONT tas-Sibt 12 ta’ Ġunju 2010.
